Што има Скопје што не знае да го искористи (видео)

Досадно е да се пишуваат текстови за се и сешто во државава, што имаме, а не умееме да го валоризираме. Постојано се зборува за развој и инвестиции, а притоа проектите кои се реализираат се 3 засадени дрва и 5 исечени. Ни тука немаме баланс, мајстори сме за дебаланс и деструкција.

Многу ски центри и рекративни зони во текот на летниот период низ Европа и низ светот функционираат и во летна варијанта, 365 дена, имаат куп содржини. Без разлика што главната цел порано било скијањето, денес речиси сите успешни центри имаат 4 сезонска понуда на забава и рекреација, што не е случај кај нас. Таа понуда обезбедува постојан и поголем процент на искористеност на ифраструктурата и човечките ресурси со што центрите надокнадуваат на приходната страна во текот на летото.

Во случајов градот Скопје во своја непосредна близина ја има планината Водно за која многумина би сакала да ја имаат на располагање покрај себе. На Водно, со изградбата на гондолата се отвори можност за развој на адреналинската понуда во форма на бајк парк, односно возење планински велосипед низ козји – планинарски патеки, активност што се повеќе е застапена, влече посетители и е добра за туризмот и гранките кои гравитираат околу оваа активност. Оваа понуда како содржина ја имаат речиси сите ски центри или рекреативни зони во регионот или барем оние кои имаат намера успешно да фунцкионираат.

Но што е тука проблемот? Најголем проблем е секогаш тотална незаинтересираност за развој на терен, наспроти развој кој се вергла како навиена лента, по собири, конгреси, симирани и состаночиња. Не дека немало иницијативи, имало, но тие секогаш биле пречекани без интерес, по можност и со некоја обструкција, а станувало збор за развојни иницијативи и проекти.

Прво потребно е да се реализира целосно инвестицијата и да се доизгради гондолата до самото подножје на градот, за максимум ефект. Независно од тоа, потребни се навистина малку финансиски средства кои градот Скопје би требало да ги издвои и да инвестира во веќе постоечките патеки, 3-4 на број кои се користат од страна на велосипедистите со цел да се зголеми нивото на безбедност, квалитет, нивна категоризација. Таму нема потреба од бетонирање, асфалт уништување на шума. Се што треба е алат, работна сила и луѓе кои ја познаваат оваа тематика со цел патеките да се обработат соодветно, да се постави соодветна ифраструктура и да бидат маркирани. На овие патеки нема да смеат да се искачуваат планинари, ниту пак велосипедистите би смееле да се пуштаат по други патеки кои се недозволени за нив. Оваа содржина веќе фунцкионира, но потребно е соодветно да се регулира со цел да се подигне нивото на квалитет и безбедност. Секако тогаш ќе доаѓаат далеку поголем број на туристи кои сакаат адреналинска забава, а ќе се отворат можности и за организирање на квалитетни меѓународни натпревари кои би придонеле за дополнителна афирмација. Скопје и Водно имаат извондредна атрактивна локација и инфраструктура за тоа.

https://www.facebook.com/SkiMacedonia/videos/1135047839966828/