Пилатес на планина заедно со FitLife

Со почетокот на новата сезона фитнес студиото FITLIFE ве носи на едно поинакво пилатес искуство: пилатес во планина и планинарење по падините на Бистра.

Заедно со Тони Димитров – сертифициран планинарски водич и инструкторите од FITLIFE, каде покрај опуштањето со пилатес ќе ви понудиме и искачување по падините на Бистра и врвот Сандакташ.

Врвот Сандакташ е еден од повисоките врвови на планината Бистра во Националниот парк Маврово и е висок 1981 м.н.в.. Се работи за лесна тура, се искачуваат околу 600 метри висинска разлика, но сепак е потребно доволно подготвеност и кондиција, посебно во вториот дел од турата и искачувањето непосредно пред врвот. Искачувањето до врвот е 2 до 2,5 часа во зависност од подготвеноста на групата. Започнува од селото Никифорово и патеката се движи низ букова шума, потоа се излегува од шумата и движењето продолжува до бачилото од каде започнува финалното искачување кон Сандакташ. Погледот од врвот е спектакуларен од каде се гледаат Мавровското езеро, врвот Меденица, Корабскиот масив…Од опрема задолжително да се понесат планинарски обувки, јакна/кабаница поради можност за променливо време и ветар, капа и крем за заштита од сонце. По патот ќе се изведуваат кратки паузи во зависност од потребата. Вода за пиење има во селото и во текот на искачувањето.

Наредниот ден започнува со едночасовен утрински пилатес каде вежбите за расонување ќе бидат проследени со длабоки истегнувања на сите мускулни групи. Посебен акцент на пилатесот е зацврстување на торзото, преку кое се зацврстуваат и стануваат пофлексибилни сите мускули и сите зглобови на телото. По сместувањето и искачувањето на врвот инструктор од студиото FITLIFE ќе го води часот кој ќе биде составен од длабоки пилатес истегнувања на сите мускулни групи од телото, за побрзо метаболизирање на млечната киселина во мускулите насобрана после искачувањето на врвот. Движењата се едноставни, но бараат многу прецизност и баланс.

Сместувањето е во планинарскиот дом Царевец кој располага со кујна, тоалет, топла вода и удобно сместување. Храна секој си носи сам, а во домот има услови за приготвување на истата.

Целосна програма:

31 август
• 8 ч. тргнување од Скопје со организиран превоз (од паркингот на Веро Тафталиџе)
• 10 ч. пристигнување во Никифорово и искачување кон врв Сандакташ
• 16 ч. симнување во Никифорово и поаѓање кон планинарскиот дом Царевец
• 19 ч. вечерно длабоко едночасовно пилатес истегнување кое целосно ќе ве опушти по искачувањето на врвот

1 септември
• 8 ч. будење на телото со 1 час мат пилатес• 9 ч. доручек
• 10 ч. слободни активности/прошетка
• 18 ч. враќање кон СкопјеПоаѓањето е на 31 август во 8 ч. од паркингот на Веро тафталиџе, а враќањето е на 1 септември во вечерните часови. Превозот е организиран со комбиња од Скопје до село Ниќифорово. Бројот на местата се ограничени.
Цена 1400 ден. Во цената е вклучен превоз – Скопје – Никифорово – Маврово – Скопје, сместување и ноќевање во Царевец, водење на турата од сертифициран водич, пилатес часови. Бројот за пријавување е ограничен на 15 места.Пријавувањето е задолжително на броевите 072 243939 и 076 438317 заклучно со петок 29 август или додека не се пополни предвидениот капацитет.

* * *
Секоја промена или откажување на учеството на турата да се пријави кај организаторот. Турата е отворена и за членови на планинарски друштва, за ентузијасти, па и за оние кој нема да го искачуваат врвот, или сакаат само пилатес во природа. Организаторот го задржува правото да направи промени на турата.