skimacedonia
Советот на Месната заедница Галичник, за 42. издание на атрактивната културолошка и туристичка манифестација „Галичка свадба – 2015“, ги избра Билјана Гегоска, со длабоки корени од Галичник и Филип Белчев од Скопје.
Овој викенд на 11-12 јули , во попладневните часови, од Укален ќе одекне екот на зурлите и тапаните, со што ќе го најават почетокот на вековната традиционална Петровденска галичка свадба. Вечерта, автентично пред куќата на младоженецот и пред куќата на невестата и низ Галичник, автентично ќе бидат изведени десетина свадбарски обичаи, ќе бидат испеани и многу свадбарски и обичајни песни. Следниот ден, на Петровден, младите ќе се венчаат во импозантниот храм „Свети Петар и Павле“, каде што пред Бога ќе си ветат долговечен, верен, заеднички живот исполнет со многу дечиња.
Кандидатите за годинешна невеста и зет на „Галичката свадба“ , Билјана Гегоска и Филип Белчев, во апликацијата на конкурсот што го имаше распишано Советот на Месната заедница, својата желба за да бидат избрани ја образложија со следните податоци:„ Галичник, Мајовци, црквата „Св. Петар и Павле“ од клепан камен и местоположбата која се издигнува среде Галичник и му дава посебен белег: бајракот и горското цвеќе со кој е накитен, коњаници, петлици, факли, чешма упија, „Тешкото“, „Невестинското“… , не се само зборови кои се зборуваат кога се споменува манифестацијата „Галичка свадба“, туку се длабоко врежани во нашите души и со нив живееме. И ние сме оние што ја продолжуваат традицијата како фамилија со галичко потекло, со корен од Геговци, Крсте, Ѓорѓи, Крсте….
За нас „Галичката свадба“ не е манифестација, туку е овековечување на нашата љубов, како што и учеството наше и на нашите фамилии, нема да биде улога, туку ќе претставува чекорење по стапките на нашите предци“.
